ప్రేక్షకులతో సినిమా చూస్తా.. అనుమతించండి: సూర్య పత్రిక లో హీరో నాని

సినిమాను ప్రేక్షకులతో కలిసి థియేటర్లో చూడటం తనకు ఎంతో ప్రత్యేకమైన అనుభూతినిస్తుందని నాని పేర్కొన్నారు. ఆర్టీసీ క్రాస్రోడ్స్ ప్రాంతం హైదరాబాద్ సినీ అభిమానులకు ఎంతో ప్రత్యేకమైనదని, తాను నటించిన సినిమాను తాను అభిమానించే ప్రేక్షకులతో కలిసి వీక్షించాలని కోరుకుంటున్నట్లు తెలిపారు. అదే సమయంలో, ప్రజల భద్రతకు సంబంధించిన అన్ని నిబంధనలు, మార్గదర్శకాలను తప్పకుండా పాటిస్తామని నాని స్పష్టం చేశారు.

నాని విజ్ఞప్తిపై స్పందించిన సీఎం రేవంత్రెడ్డి, స్థానిక పోలీస్ స్టేషన్లో అధికారికంగా దరఖాస్తు చేసుకోవాలని సూచించారు. భారీగా అభిమానులు తరలివచ్చే అవకాశం ఉన్నందున, జన సమీకరణ, భద్రత, ప్రజల రాకపోకలకు ఎలాంటి ఇబ్బందులు కలగకుండా పోలీసులు పరిస్థితిని సమీక్షించి తుది నిర్ణయం తీసుకుంటారని తెలిపారు.

సినిమాటోగ్రఫీ మంత్రి కోమటిరెడ్డి వెంకటరెడ్డి కూడా నాని కోరికను ప్రస్తావిస్తూ, చిత్రబృందం పోలీసులకు దరఖాస్తు చేసుకోవాలని సూచించారు.

ఇదిలా ఉండగా, ప్రస్తుతం హైదరాబాద్లో గణేశ్ నిమజ్జన ఏర్పాట్లు కొనసాగుతున్న నేపథ్యంలో, భద్రత, జనసమీకరణ అంశాలను దృష్టిలో ఉంచుకుని నాని పోలీసుల తుది నిర్ణయానికి కట్టుబడి ఉంటానని తెలిపారు. తన పర్యటన వల్ల పోలీసు శాఖపై అదనపు భారం పడటం లేదా ప్రజలకు అసౌకర్యం కలగడం తనకు ఇష్టం లేదని, భద్రతాపరమైన ఇబ్బందులు ఉంటే థియేటర్ సందర్శనను విరమించుకుంటానని నాని స్పష్టం చేశారు.

శ్రీకాంత్ ఓదెల దర్శకత్వంలో తెరకెక్కిన ది ప్యారడైజ్లో నాని ప్రధాన పాత్రలో నటించారు. ఈ చిత్రం ప్రపంచవ్యాప్తంగా విడుదల కానుంది.